Սկլերոթերապիան քիչ ինվազիվ պրոցեդուրա է, որը կիրառվում է վարիկոզի բուժման համար։ Բուժման ընթացքում բժիշկը հատուկ դեղանյութ է ներարկում խնդրահարույց երակի մեջ։ Այս նյութը գրգռում է երակի ներսի պատերը՝ հանգեցնելով դրանց փակման։ Ժամանակի ընթացքում այդ երակը այլևս չի մասնակցում արյան շրջանառությանը և աստիճանաբար անհետանում։ Արյունը սկսում է հոսել ավելի առողջ ու ուժեղ երակներով։
Այս մեթոդը կիրառվում է թե՛ բժշկական, թե՛ կոսմետիկ նպատակներով՝ օգնելով ազատվել ցավից, այտուցից ու անհանգստությունից, ինչպես նաև բարելավելով ոտքերի արտաքին տեսքը։
Ինչպե՞ս է կատարվում պրոցեդուրան
Սկլերոթերապիան իրականացվում է ամբուլատոր պայմաններում և տևում է ընդամենը 20-45 րոպե։ Եթե երակները մեծ են, կարող են անհրաժեշտ լինել մի քանի ներարկումներ։ Վերջում կիրառվում են կոմպրեսիոն գուլպաներ՝ բուժված երակների փակվելու և ապաքինման գործընթացը բարելավելու համար։ Բուժման համար անհրաժեշտ սեանսների քանակը կախված է երակների չափից և քանակից։ Սեանսները սովորաբար իրականացվում են 4-6 շաբաթ ընդմիջումներով։
Ի՞նչ սպասել միջամտությունից հետո
- Կարող եք անմիջապես վերադառնալ առօրյա գործերին, սակայն խորհուրդ է տրվում մի քանի օր խուսափել ծանր ֆիզիկական աշխատանքից։
- 1-2 շաբաթ անհրաժեշտ է կրել կոմպրեսիոն գուլպաներ՝ լավ արդյունքի համար։
- Կարող են առաջանալ փոքր անցողիկ կողմնակի ազդեցություններ, ինչպես օրինակ՝ կապտուկներ, կարմրություն կամ քորի զգացում ներարկման հատվածում։
Սկլերոթերապիայի առավելությունները
- Արդյունավետություն – 50-80% դեպքերում երակները վերանում են։
- Ոչ վիրաբուժական մեթոդ – Չի պահանջում անզգայացում կամ կտրվածքներ։
- Արագ վերականգնում – Առավել քիչ վերականգնողական շրջան՝ համեմատած այլ մեթոդների հետ։
- Գեղեցիկ ու առողջ տեսք – Վերացնում է տեսանելի երակները և ազատում ցավից ու անհանգստությունից։
Հնարավոր ռիսկերը
Չնայած սկլերոթերապիան համարվում է անվտանգ պրոցեդուրա, այն կարող է ունենալ որոշ կողմնակի ազդեցություններ՝
- Ժամանակավոր մաշկի գունափոխում կամ կապտուկներ ներարկման տեղում։
- Շատ հազվադեպ՝ ալերգիկ ռեակցիաներ։
Ճիշտ խնամքը և բժշկի ցուցումներին հետևելը նվազեցնում են ռիսկերը և ապահովում լավագույն արդյունքները։
