Լիպոսակցիան տեղային ճարպային կուտակումները հեռացնելու վիրահատություն է։ Այն իրականացվում է բարակ, մետաղյա ձողով, որը փոքր կտրվածքից մտցվում է մաշկի տակ և արտածծման միջոցով մարմնի որոշակի հատվածներից հեռացնում ճարպի ավելցուկը։ Զուտ նիհարելու նպատակով լիպոսակցիայի դիմելը սխալ կլինի, քանի որ դրա միջոցով հիմնականում կարելի է կատարել միայն որոշակի լոկալ դեֆեկտների շտկում:
Լիպոսակցիան իրականացվում է մարմնի տարբեր հատվածներում՝
- Մեջքի լիպոսակցիա – պրոցեդուրան օգնում է արագ և հյուսվածքների նվազագույն տրավմաներով վերացնել թիակների, կոնքերի և գոտկատեղի ավելորդ ճարպային կուտակումները:
- Որովայնի լիպոսակցիա-թույլ է տալիս հեռացնել որովայնի առաջային պատին և կողային հատվածներին կուտակված ենթամաշկային ճարպը:
- Ազդրերի լիպոսակցիա – այն պլաստիկ վիրահատություն է, որը թույլ է տալիս ազատվել ազդրերի հատվածի չափից ավելի ճարպային կուտակումներից:
- Կոնքերի լիպոսակցիա – այն շտկող պրոցեդուրա է՝ ուղղված նշված հատվածի ճարպային կուտակումների վերացմանը:
- Նստատեղի լիպոսակցիա – գեղեցիկ ուրվագծերով հետույքային հատված ստանալու ժամանակակից մեթոդ է:
- Սրունքների լիպոսակցիա-ճարպի հեռացման միջոցով ոտքերը դարձնում ենք ավելի սլացիկ ու նրբագեղ:
- Ծնկների լիպոսակցիա – փոքրացնում է ծնկների ծավալը, փոփոխում ձևը, վերացնում ծնկների ներքին ու արտաքին հատվածերի թերությունները:
- Ձեռքերի լիպոսակցիա – այն վերացնում է ուսերի, նախաբազկի և թևատակերի ճարպային կուտակումները:
Վիրահատություն
Լիպոսակցիայի ընթացքում արվում են փոքրիկ կտրվածքներ և ենթամաշկային հատվածում տեղադրվում է ճարպը վակուումով հեռացնող ձող: Ըստ ճարպի հեռացման և քայքայման մեթոդի՝ լիպոսակցիան բաժանվում է մի քանի տեսակների՝ լազերային, ուլտրաձայնային, տումեսցենտ:
Անզգայացում
Երբ լիպոսակցիան կատարվում է շատ փոքր հատվածների վրա, կարող է օգտագործվել տեղային անզգայացում: Տեղային անզգայացնող միջոցը նոսրացվում է և ներարկվում ենթամաշկային ճարպի մեջ: Թիրախային հյուսվածքը դառնում է խիտ և հեշտությամբ հեռացվում է: Այս մեթոդը նվազեցնում է ռիսկը և կանխում արյան կորուստը:
Ընդհանուր անզգայացումն իրականացվում է միայն այն դեպքում, եթե բուժառուն ունի զգալի քանակությամբ ճարպ մի հատվածում կամ ճարպի կուտակում մի քանի հատվածներում:
Հետվիրահատական ընթացք
Լիպոսակցիայից հետո 1-2 ամիս խորհուրդ է տրվում վարել ավելի պասիվ ապրելակերպ, չզբաղվել սպորտով և զերծ մնալ ծանր իրեր բարձրացնելուց: Դուք պետք է մոտ 1 ամիս կրեք կոմպրեսիվ ներքնազգեստ: Լիպոսակցիայի արդյունքները պարզ չեն լինի, քանի դեռ առկա են այտուցներ։ Այտուցների մեծ մասն անցնում է մոտ 4 շաբաթ հետո։ +Հետագայում բարդություններից ու տհաճ հետևանքներից խուսափելու և լավագույն արդյունք ունենալու համար պետք է հետևել բժշկի բոլոր ցուցումներին:
